Дэлхийн ахмад тамирчдын II наадамд манай улс анх удаа оролцоно

Эрүүл мэнд, спортын дэд сайд Т.Болдбаатар Өвлийн спортын II наадамд оролцох ахмад тамирчдаа хүлээн авч уулзаж, тугийг нь шилжүүллээ.Канад улсын Кюбек хотноо энэ сарын 31-нээс хоёрдугаар сарын 8-ны хооронд дэлхийн ахмад тамирчдын Өвлийн хоёрдугаар их наадам болох юм.

Энэ удаагийн наадамд манай ахмад тамирчид анх удаа оролцохоор бэлтгэл сургуулилтаа базааж, эх орноосоо удахгүй мордоно. Тодруулбал, Өвлийн спортын хоёрдугаар наадамд Монгол Улсын цанын спортын 28 удаагийн аварга ОУХМ Д.Энхээ, Монгол Улсын тэшүүргийн 15 удаагийн аварга, Тэшүүргийн спортын мастер Эрдэнэтуяа, өсвөр үе насанд хүрэгчдийн улсын зургаан удаагийн аварга ОУХМ Д.Очирсүх нарын алдар цуутай ахмад тамирчид шорттерк, гүйлтийн цана, тэшүүрийн төрлөөр оролцох юм.

Наадамд ОУХМ Д.Энхээ төрийн далбаагаа барьж оролцох бөгөөд түүнд Эрүүл мэнд, спортын дэд сайд Т.Болбаатар алтан соёмбот тугийг гардуулан өгсөн юм. Мөн энэ үеэр наадамд оролцох нийт тамирчид, дамжуулагчид болон багийн хамт олонд Эрүүл мэнд, спортын яамнаас их наадмын нээлт, хаалтын арга хэмжээнд зориулсан жигд хувцас бэлэглэсэн юм.