Шатахууны үнэ буурах боломжтой

Шатхууны үнэ нэмэхэд дагаад өргөн хэрэглээний бараа, бүтээгдэхүүний үнэ өсдөг бичигдээгүй хууль бий. Атга гурил, үмх махан дээр ч шатахууны үнийн өсөлт яригдсаар ирсэн. Харин “Шинэчлэлийн” Засгийн газрын үед шатахууны үнэ нэмэгдээгүй юм. Учир нь “Үнэ тогтворжуулах хөтөлбөр”-ийн хүрээнд шатахууны үнийг тогтвортой барьсан. Энэ ажлын хүрээнд нефьт импортолдог компаниуд 195 тэрбум төгрөгийн хөнгөлөлттэй зээл олгосонтой холбоотой юм. Нефть импортлогч компаниуд шатахууны үнэ нэмэх шалтгаанаа ердөө хоёрхон зүйлтэй холбон тайлбарладаг. Нэгдүгээрт, гадаад зах зээл дэх газрын тосны үнийн өсөлт. Хоёрдугаарт, валютын ханшийн тогтворгүй байдал. Гэтэл дэлхийн зах зээл дээр нефтийн үнэ таван жилийн хугацаанд хамгийн доод үнэд хүртлээ унаж, нэг баррель нефть 50 ам.доллар болтлоо доошлов. Гэвч нефьт импортлогчид шатахууны үнээ бууруулахыг хүсэхгүй байгаа юм.

Тэд “Үнэ тогтворжуулах хөтөлбөр”-ийн хүрээнд 1895 төгрөгийн ханштай байсан ам.доллараа зах зээлийн ханшаас хэт доогуур үнээр буюу 1443 төгрөгөөр авч байсан. Одоо 1900 төгрөг давж байгаа үед үсрээд 1500 орчим төгрөгөөр авч байгаа гэхэд нэг их зөрөхгүй биз. Гэтэл шатахууны үнийг бууруулахгүй байгааг иргэд гайхаж байгаа юм. УИХ-ын зарим гишүүн шатахууны үнэ буурах боломжтой гэж хэлж байна. 2015 оноос Монголбанк болон Засгийн газар хамтраад хэрэгжүүлж байсан Үнэ тогтворжуулах хөтөлбөрөөс аажмаар гаргах бодлогыг баримталж байгаа. Энэ нь ч цаг үетэйгээ нийцсэн бодлого гэж тайлбарлаж байна. Үнэ тогтворжуулах хөтөлбөрийг тодорхой хугацаанд хэрэгжүүлсний дүнд бензин, шатахуун болон гол нэрийн барааны үнийг тодорхой төвшинд барьсан гэж эрх баригчид тайлбарладаг. Шатахууныг дотооддоо үйлдвэрлэдэггүй гаднаас импортолдог учраас валютын ханшийн хэлбэлзэл үүнд нөлөөлдөг. Энэ нь эргээд өргөн хэрэглээний барааны үнэ болон инфляцид нөлөөлж ирсэн билээ.