Төр ТөмбөгөрМонголын Нэгдмэл Боксын Холбоо (Mongolian United Boxing Federation)-ноос мэргэжлийн боксын халз тулааныг анх удаа Эрдэнэт хотод зохион байгуулах гэж байна.
Тус холбооноос тэмцээний талаар хэвлэлийн бага хурал хийлээ. Арванхоёрдугаар сарын 6-ны өдөр Эрдэнэт хотын “Хангарди палас”-т болох “Erdenet Cup-2024” боксын тулаанд нийт долоон жинд 14 тамирчин өрсөлдөнө. Үүнээс зургаан тулаан эрчүүдийнх бол нэг нь эмэгтэй боксын халз тулаан байх юм.
“Erdenet Cup-2024” мэргэжлийн боксын тулааныг Монголын Нэгдмэл Боксын холбоо, Монголын боксын холбоо хамтран зохион байгуулж, Их спортыг дэмжигчээр “Эрдэнэт үйлдвэр” ТӨҮГ, MNB Спорт суваг, “Unival” студи ажиллаж байгаа юм. Эрдэнэт үйлдвэрийн Спорт цогцолбор, Их спортыг хөгжүүлэх хэсэг жилийн төлөвлөгөөнд тусгагдсаны дагуу уг тэмцээнийг зохион байгуулахад гар бие оролцож, тус үйлдвэрийн бусад бүтцийн нэгжүүд зохион байгуулалтад хамтран ажиллаж байна. Мөн MNB Спорт суваг, төв, орон нутгийн хэвлэл мэдээллийн байгууллагууд мэдээлэл, сурталчилгаанд дэмжлэг үзүүлж байгааг дурдаж, Их спортыг хөгжүүлэх, тамирчдаа дэмжих үйлсэд сэтгэл зүрхээ зориулан, хамтран ажиллаж байгаа бүх хүмүүстээ талархаж байгаагаа Монголын Нэгдмэл Боксын холбооноос Хэвлэлийн бага хурлын үеэр илэрхийлсэн.
Мэргэжлийн боксын тулааныг сонирхолтой, “үзээтэй” байлгах үүднээс жин жинд өрсөлдөх тамирчдыг туршлага, чансаагаар нь эн тэнцүү байхаар сонгосон байна. Тамирчид тулааны өмнө буюу арванхоёрдугаар сарын 5-ны өдөр жингээ үзэж, нүүр тулах “Face off” уулзалт хийж, өөрсдийн бие бялдар болоод, сэтгэл зүйн бэлэн байдлаа боксын спортын хөгжөөн дэмжигчдийнхээ өмнө харуулна.
Боксын спорт сонирхогч, үзэгч, хөгжөөн дэмжигчид арванхоёрдугаар сарын 6-ны өдөр “Erdenet Cup-2024” мэргэжлийн боксын тамирчдын гал гарсан халз тулаан төдийгүй амьд хөгжим нүргэлж, алдар нэр нь түгсэн хамтлаг, дуучдын тоглолт бүхий дөрвөн цагийн шоуг дэргэдээс нь үзэх боломжтой. Онцгой суудал сонгон захиалсан үзэгчид тусгайлан зассан ширээнд тухлан, амтат зууш, дарс шимэнгээ халз тулааныг хамгийн халуун цэг, харууцтай өнцгөөс үзэх боломжийг ч бүрдүүлжээ. Халз тулааны тасалбарыг www.ticket.mn -ээр захиалан авах боломжтой.
Монголын Нэгдмэл Боксын холбооноос анх удаа зохион байгуулж буй “Erdenet Cup-2024” мэргэжлийн боксын тулааныг цаашид жил бүр уламжлал болгохоор төлөвлөж байгаа. Тиймээс ч уг тулааныг боксын тамирчид чадал, чансаагаа сорьдог, үзэгч, хөгжөөн дэмжигчдийн хүсэн хүлээдэг спортын тулаан болгохын тулд бэлтгэл, зохион байгуулалтыг өндөр түвшинд хангаж байгааг тус холбооны удирдлага, дасгалжуулагчид хэлж байна.
Мөн “Erdenet Cup-2024” тэмцээнээр дамжуулж ид гялалзаж яваа шилдэг тамирчдаа олонд илүү таниулах, урам зориг өгөх, цааш, цаашдын улсын болон олон улс, тив, дэлхийн тэмцээнүүдэд нь бие бялдар, сэтгэл зүйн бэлтгэл болгохоос гадна тамирчдынхаа орлогын эх үүсвэрийг нэмэгдүүлэх, мэргэжлийн боксын тулааныг олон улсын жишгээр зохион байгуулж, дэлхийн хэмжээний тамирчид төдийгүй спортын хөгжөөн дэмжигчид, дэлхийн хэмжээний үзэгчдийг бэлтгэх замаар их спортыг хөгжүүлэх олон том зорилго агуулж байгаагаа зохион байгуулагчид онцолж байлаа.
Сэтгэгдэл нэмэх