“Хүнээс ичихгүй, ийм эрх чөлөөтэй байхсан гэсэн далд хүсэл байдаг учир хүмүүс Осоржамаагийн бичлэгийг үздэг” гэв

Д.Эрдэнэбаатар: Осоржамаа хүмүүсийн анхдагч инстект буюу зөн билэг дээр нь тоглолт хийдэг

Сэтгэл засалч эмч Д.Эрдэнэбаатартай ярилцлаа.

-О.Осоржамаа гэх залуу фэйсбүүкт лайв хийх тоолонд монголчууд 20, 30 мянгаараа үзэж, нэг удаагийн бичлэгийнх нь үзэлт хагас саяд хүрээд байна. монголчууд ямар учраас энэ хүний лайвыг үзээд байна вэ?

-Хүнийг шоолоход инээдтэй, зугаатай байдаг. Инээхэд эндофрин буюу аз жаргалын даавар ялгардаг. Осоржамаа маазрахдаа цаанаа ямар нэгэн санаа, ямар нэгэн зүйл илэрхийлдэг байлгүй дээ. Нийгэм, тухайн үед болж байгаа үйл явдлыг мааз маягаар тайлбарлах ч гэдэг юм уу. Би нэг удаа билүү дээ бичлэгийг нь хальт сонсож байсан юм.

-Тэр залуу ганцаараа амьдардаг. өөрт тохиолдож буй жаргал, зовлонгоо найздаа ярьж байгаа мэт л нээлттэй ярьдаг. Заримдаа санхүүгийн тусламж гуйж банкны дансаа хүртэл зарладаг?

-Хүний өрөвдөх булчирхайн дээр тоглолт хийдэг, илэн далангүй зовлонгоо ярьдаг. Тухайн үеийн нөхцөл байдал, үйл явдлыг улстөрчид шиг багтай биш, баггүйгээр илэн далангүй шүүмжилдэг болохоор хүмүүст тэр нь таалагддаг байх. Хүмүүсийн ихэнх нь багтай амьдардаг. Гэтэл энэ хүнд баг байдаггүй. Хүмүүс дотроо баггүй, оригналиараа байхыг хүсээд байдаг боловч нийгмийн шаардлагын дагуу тэгж чаддаггүй. Тэр хэрэгцээг нь л Осоржамаа хангадаг болов уу даа.

-Эрэгтэй мөртлөө хумс, нүүрээ будаж, гоо сайхны зөвлөгөө өгөөд байдаг?

-Тэр үйлдэл нь хүнийг шууд татна. Хүн чинь сэтгэл зүйн хувьд ямар нэгэн гаж гэдэг юм уу тиймэрхүү юманд татагдах инстект байгаа шүү дээ. Хүмүүс чинь яах гэж аймшгийн кино үздэг билээ дээ.

-Нэгэн эмч лайв хийж чихрийн шижингийн талаар зөвлөгөө өгөхөд 36-хан хүн үзсэн бол О.Осоржамаагийн ямар ч мэдээлэл, ач холбогдолгүй лайвыг нэгэн зэрэг 34.000 хүн үзэж байна. Түүнийг лайвын дундуур “Бие засаад ирье” гэхэд 28 мянган хүн хүлээдэг?

-Анхдагч инстект буюу зөн билэг дээр л тоглолт хийдэг хүн байна. Маш энгийн, чөлөөтэй. Хүмүүс Осоржамаагаас ямар нэг чөлөөт байдлыг мэдэрдэг байх. Хүсэн хүлээдэг зүйлээ бичлэгнээс нь хардаг. Хүнээс ичихгүй, өөрийн мэдэлгүй ийм болохсон, ийм байхсан гэдэг далд хүсэл хүмүүст байдаг. Өөрөөрөө байхсан гэдэг ч юм уу. Тэр чинь өөрөө эрх чөлөөний мэдрэмж байдаг. Эрх чөлөө чинь ямар ч хүнд тааламжтай. Лайвын үеэр гаргаж буй үйлдлүүд нь хүний анхдагч зөн дээр л тоглолт хийдэг юм байна.

Аливаа зүйлийг ямар ч цензургүй, тэр чигээр нь шүүм-жилдэг учраас улстөрчдийг ч юм уу, хэн нь хэн бэ гэдгийг баггүйгээр хэлдэг. Тэрийг үзээд “Өө, нээрэн Осоржамаагийн үнэн байна шүү дээ” гэдэг нөлөөлөл явж байх магадлалтай. Эерэг нөлөөлөлтэй байх магадлал бий.

-О.Осоржамааг шүүмжлээд дургүй гэж хэлдэг ч ингэж олноороо үзэж, шэйрлээд байгаа нь ямар учиртай юм. Осоржамаад дургүйгээ илэрхийлж уурлаж байгаа ч цаашаа очоод үзчихдэг?

-Уурлаж байгаа нь нийгмийн өнөө шаардлагын дагуу зүүж байгаа баг. Сөрөг юм ярихгүй байгаа нь хүнийг маш их татна. Манай улстөрчдийн гаргаж байгаа хамгийн том тэнэглэл буюу алдаа бол бие биенээ муулаад гүйгээд байх. Тэр нь хүмүүсийг түлхдэг. Хүн гэдэг чинь зөнгийн түвшинд аз жаргал руу тэмүүлж байдаг, муу муухайг сонсох дургүй байдаг. Нөгөө талдаа бас нэг дотоод зөрчил байдаг нь юу вэ гэхээр, мууг бас сонирхож үзэх хандлага байгаад ч гэхдээ үндсэн зөн нь сайн руу тэмүүлдэг.

-Осоржамааг гудамжинд явахаар нь зодоод, зургийг нь дарж, шоолж шоглоод дооёолдог хэрнээ лайвыг нь шимтэн үзээд байдаг?

-Цахим орчин бол энэ хүний аюулгүй орчин байна шүү дээ.

Б.Ууганцэцэг: Чөлөөтэй байдлыг мөрөөдсөн хүмүүсийн далд хүслийг Осоржамаа лайваараа ил харуулаад байгаа

Сэтгэл судлалын үндэсний төвийн гүйцэтгэх захирал, сэтгэл судлаач Б.Ууганцэцэгтэй ярилцлаа.

-Жирийн нэгэн залуугийн эгэл бор амьдрал, илэн далангүй лайвыг монголчууд яагаад ингэж олон мянгаараа үзээд байна вэ. үүнийг та сэтгэл зүйн талаас нь тайлбарлавал?

-Өвөрмөц байгаа байхгүй юу. Үзэл бодлоо юунаас ч айхгүй, ичихгүйгээр нээлттэйгээр хэлээд байдаг. Хүмүүс “Тэр ингээд бодчих вий, энэ ингээд бодчих вий” гэж баригдмал байдаг. Гэтэл Осоржамаад ямар ч хязгаар байхгүй болохоор тэр нь хүмүүст сонирхолтой байгаа юм. Тийм юм чинь хүмүүст маш үнэн санагддаг. Худлаа юмнаас хүмүүс залхчихсан гэх үү дээ. Хүний яриад байгаа үнэн юмыг сонсчих юмсан гэдэг. Ямар нэгэн юманд баригдахгүйгээр ах дүү маань тэгээд бодчих вий, танил нөхөд, тэр намайг тэгээд бодчих вий гэдэг юм тэр хүүхдэд байхгүй л байгаа юм.

-Хүмүүс Осоржамаа шиг тийм нээлттэй, эрх чөлөөтэй байж чаддаггүй болохоороо тэр дутуугаа олж авах гэж бичлэгийг нь үздэг гэсэн үг үү?

-Өөрөөрөө байгаа нь хүмүүст таалагдаад байдаг. Ямар ч хүн бүжиглээд, нүцгэлээд сонин сонин хувцас өмсөөд нийтэд гарч чадахгүй. Би нэг удаа цаг гаргаад бичлэгийг нь үзсэн. “Намайг хүлээж байгаарай” гээд хөгжим тавиад, дараа нь өөрөө бүжиглэдэг юм билээ. Өөрийнх нь хийж чадахгүй байгаа юмыг хийхээр хүнд сонирхолтой байна л даа.

-Осоржамаа энэ олон мянган үзэгчдийг ямар нэгэн тал руу нь дагуулах ч юм уу, юманд уриалан дуудах ч юм уу, тиймэрхүү үйлдэл гаргахад хүмүүс яах бол, дагах уу. энэ хүний лайвын эерэг, сөрөг нөлөө гэвэл?

-Хүүхдэд энэ хүний лайвыг үзүүлэх үү, үзүүлэхгүй байх уу гэдэгт эцэг эхийн хараа хяналт л байгаа байхгүй юу. Бичлэгийг нь үзэх үү, үзэхгүй юу гэдэг нь тухайн хүний асуудал. Юун хүүхдэдээ үзүүлэхгүй байх. Эцэг эхчүүд нь өөрсдөө зэрэгцэж сууж байгаад хүүхдийнхээ дэргэд үзэцгээдэг. Чөлөөтэй байдлыг мөрөөдсөн хүмүүсийн далд хүслийг л лайваараа ил харуулаад байгаа юм.

-Хүмүүс лайвыг нь үзээд түүнтэй өөрийнхөө амьдралыг харьцуулаад түүнээсээ өөрийгөө илүү гэдгийг мэдрэх замаар таашаал авч байна ч гэцгээдэг?

-Байж болох талтай. Гэхдээ тэр хүүхдийн илүү чөлөөтэй байгаа байдал сонирхолтой санагдаад, хүн чинь ийм байж болдог юм байна, ийм чөлөөтэй байдаг юм байна гэдэг тийм мэдрэмжээ л лайвнаас нь олж аваад байгаа юм.