Аудитын газрын тайланг шүүмжлэв

Төсвийн байнгын хорооны өчигдрийн хуралдаанаар Үндэсний аудитын газраас Эрүүл мэндийн даатгалын сан, иргэний нэрийн дансанд хуримтлагдсан мөнгөн хөрөнгийн байдалд хийсэн аудитын тайланг танилцуулсан юм. Одоо УИХ- аар Эрүүл мэндийн даатгалын сангийн тухай хуулийг хэлэлцэж байгаа. Тиймээс аудитын дүгнэлт ач холбогдолтой хэмээн гишүүд үзэж байсан. Гэвч энэ удаагийн аудитын дүгнэлтийг ойлгомжгүй, санхүүгийн тооцоог нь буруу гаргасан гэхмэтчилэнгээр шүүмжилж эхлэв. Учир нь даатгагдсан хүний тоо хоорондоо их зөрүүтэй байна гэсэн юм. Аудитын газрынхан тусгай аргаар тоо баримтаа гаргасан гэдгээ тайлбарлахыг хүссэн ч гишүүд хүлээж авсангүй.

Тодруулбал, УИХ-ын гишүүн Н.Батбаяр “Тоо баримтууд нь авцалдаагүй, ойлгомжгүй байна. Монголын Үндэсний аудитын газрын тайлан мэдээ нь хэмжих нэгжгүй байна. Даатгагдсан хүний тоо балансаа барихгүй байна. Нийгмийн даатгалын нэрийн дансны жилийн хүү нь яагаад 22 хувь болж байгаа юм бэ. Ирэх оны нэг сараас тэтгэвэрт гарах эмэгтэйчүүд нэрийн даатгалаас тэтгэвэр авах ёстой. Ирэх онд тэтгэвэр авах эмэгтэйчүүдийн тоо энэ оноос буурлаа гэж байна. Та бүхэн сайныг ч саарыг ч хэлэх ёстой. Гэтэл ямар ч ойлгомжгүй тайлан оруулж ирлээ. Аудитын газар ийм тайлан оруулж ирж болох уу” хэмээн бухимдав. Харин УИХ-ын гишүүн Д.Ганхуяг “Эрүүл мэндийн сангийн даатгалын тухай хуулийг хэлэлцэж байгаа энэ үед их чухал мэдээлэл байна.

Нэрийн дансыг санхүүжүүлэхэд хэр хэмжээний мөнгө хэрэгтэй вэ. Нийгмийн даатгалын сангийн орлого, зарлага төсвийн бүрэлдэхүүн байдаг. УИХ-аас хууль батлахаасаа өмнө бодлого гаргах шаардлагатай байна. Манай аудитынхан ямар чиглэл өгч байна вэ. Эрүүл мэндийн даатгалын хөрөнгийг эмнэлгүүд хувьсах зардал маягаар зарцуулж байна. Эрх зүйн орчныг сайн бүрдүүлэх ёстой” гэсэн санал гаргасан юм. Төсвийн байнгын хорооны дарга Ц.Даваасүрэн үндэсний аудитын газрынхныг тооцоогоо нэгтгэж, ойлгомжтой цэгцтэй болгохыг сануулав.