Төр ТөмбөгөрМэргэжлийн Хяналтын Ерөнхий Газрын даргын баталсан 01/240 дугаартай Ерөнхий боловсролын сургууль, цэцэрлэгийн орчимд худалдаалагдаж буй хүнсний бүтээгдэхүүний нэр төрөл, баталгаажилт, хадгалалт, тээвэрлэлтийн байдалд урьдчилан сэргийлэх хяналт шалгалт хийх удирдамжийн хүрээнд хяналт шалгалт хийлээ.
Шалгалтанд Баянзүрх дүүргийн Ерөнхий боловсролын 21, 44, 48, 53, 79, 84, 110, 111, 120, 127,137, 142, Шинэ Монгол, Хууль сахиулах их сургуулийн лицей, Тэмүүжин өрлөг, Монтероза сургуулиудын орчимд хүнсний худалдааны чиглэлээр үйл ажиллагаа явуулдаг аж ахуйн нэгж, иргэн хамрагдлаа.
Шалгалтаар зөвшөөрөлгүйгээр ТҮЦ байрлуулсан, сургуулийн орчинд хориглосон хүнсний бүтээгдэхүүн болох бургер, чизбургер, кимбаб, пирошки, хуушуур, хотдог, чанасан өндөг, шарсан зайдас, мантуун бууз, шаржигнуур тахиа зэрэг хадгалалт, тээвэрлэлтийн онцгой нөхцөл шаардсан түргэн гэмтэж, чанараа алддаг хүнсний бүтээгдэхүүнүүдийг тасалгааны температурт, лангуун дээр ил задгай байрлуулан худалдсан, зөвшөөрөлгүй тамхи зарсан, үйлчилгээний ажилчид нь эрүүл мэндийн урьдчилан сэргийлэх үзлэг шинжилгээнд хамрагдаагүй, ажлын хувцас өмсөөгүй, шинжилгээ, баталгаажилтгүй хүнсний бүтээгдэхүүн худалдсан, стандартын шаардлагад нийцсэн зориулалтын тээврийн хэрэгсэлтэй газартай гэрээ хийгээгүй, тээврийн хэрэгслийн хөргүүрийн температур хэмжигчийг хянаж, бүртгэл хөтөлдөггүй зэрэг 162 зөрчил илрүүллээ.
Шалгалтаар илэрсэн зөрчлийг үндэслэн Монгол Улсын Зөрчлийн тухай хуулийн холбогдох заалтын дагуу 18 иргэнд 2900000 төгрөгийн шийтгэлийн арга хэмжээ ногдуулж, хаяг шошго, түргэн гэмтэж чанараа алдсан 17 нэрийн 606 ширхэг 504500 төгрөгийн хүнсний бүтээгдэхүүнийг улсын байцаагчийн 5 актаар хураан авч устгуулахаар Нийслэлийн зөвлөлд шилжүүллээ.
