Энхийг сахиулагчдыг шагналлаа

Афганистан улс дахь Аюулгүй байдлыг тогтворжуулах Олон улсын хүчний ажиллагаанд үүрэг гүйцэтгэсэн эргүүл хамгаалалтын ротын X ээлж, “Каиа” баазын Олон улсын нисэх зурвасын хамгаалалтын салааны VII ээлж, Хойд Судан улсын “Дарфур” мужид явагдаж буй Нэгдсэн үндэстний байгууллага, Африкийн холбооны хамтарсан энхийг сахиулах ажиллагаанд үүрэг гүйцэтгэсэн цэргийн хээрийн II шатны эмнэлгийн V ээлжийн цэргийн багын бие бүрэлдэхүүнд Төрийн одон медаль болон Батлан хамгаалах салбарын шагнал гардууллаа. Ёслолын ажиллагаанд  УИХ-ын гишүүн, Засгийн газрын гишүүн, Батлан хамгаалахын сайд Ц.Цолмон, ЗХЖШ-ын дарга дэслэгч генерал Ц.Бямбажав, БХЯ-ний Төрийн нарийн бичгийн дарга хошууч генерал З.Болдбаатар нар болон БХЯ, ЗХЖШ-ын удирдах бүрэлдэхүүн, албаны бусад хүмүүс, цэргийн багуудын бие бүрэлдэхүүн, тэдний ар гэрийн төлөөлөл  оролцлоо.Манай цэргийн алба хаагчид  ажиллагааны газар оронд мэдлэг, мэргэжлийн ур чадвараа дайчлан Афганистан Улсад явагдаж дууссан “Аюулгүй байдлыг дэмжих олон улсын ажиллагаа” болон  Судан улсын Дарфур мужид явагдаж буй НҮБ, Африкийн холбооны хамтарсан энхийг дэмжих ажиллагаанд тавигдсан үүргээ амжилттай биелүүлж ирсэн.

Цагийн байдлын хүнд нөхцөл, ажиллагааны газар оронд манай цэргийн алба хаагчдын олж авсан мэдлэг, дадлага, чадвар нь Монгол Улсын Зэвсэгт хүчний бэлэн байдал, үүрэг гүйцэтгэх чадавхийг нэмэгдүүлэх, цэргийн урлагийг хөгжүүлэх түүхэн ач холбогдолтой юм.

Монгол цэргийн эр зориг, тэсвэр хатуужил, мэргэжлийн ур чадварыг бодитоор харуулан арван нэгэн сарын хугацаанд дэлхий нийтийн анхаарлын төвд байгаа эбола вирусын халдварын голомтод сэтгэл зүйн тогтвортой байдлаа хадгалан төр засаг, цэргийн дээд удирдлагаас даалгасан хариуцлагатай үүргийг нэр төртэй, амжилттай биелүүлж ирсэн нь бахархам амжилт юм

Монгол Улсын төр засаг энхийн үйлсэд хүчин зүтгэж төр түмнийхээ итгэл найдвар, эх орныхоо захиас даалгаврыг мадаггүй биелүүлсэн та бүхнийхээ  хөдөлмөр, зүтгэлийг өндрөөр үнэлэн өнөөдөр төрийн одон, медалиар сайшаан урамшуулав.