Төр Төмбөгөр
Энэ долоо хоногийн эхээр Засгийн газрын тэргүүнийг огцруулах асуудал хүчтэй яригдаж байна. Улс орны эдийн засаг өдрөөс өдөрт хүндэрч, гаднаас авч буй зээл тусламжуудаа ирээдүйд төлж чадахгүйд ч хүрэх аюултай байгаа энэ цаг үед ямар хүн улс орны удирдах нь хамгаас чухал болоод байна.
Тийм ч утгаар УИХ-ын гишүүн Г.Уянга санал гаргаж, Ерөнхий сайд Ч.Сайханбилэгийг огцруулах бичигт 17 гишүүн одоогийн байдлаар гарын үсэг зуржээ. Энэ бол Ч.Сайханбилэгийг огцруулах анхны санал биш. Өнгөрсөн тавдугаар сард яригдаж байсан зүйл. Харин энэ удаагийх нь Зам тээврийн яамны Төрийн нарийн бичгийн дарга асан Б.Батзаяаг баривчилсантай холбоотой тайлбарлаж байгаа юм.
Зарим эх сурвалжийн мэдээлж буйгаар Б.Батзаяа нь УИХ-ын гишүүн Х.Баттулгын хүн. Ер нь Х.Баттулгыг Ерөнхий сайдад зүтгүүлэх сонирхолтой олон хүн байгаа учир, одоогийн Засгийн газрын тэргүүнийг огцруулахаар ийнхүү гарын үсэг зурж эхэлсэн байж магадгүй талтай.
Мэдээж хэрэг АН өөрсдийн Ерөнхий сайдаа огцруулахгүй. Тус намын бүлэг ч хэлэлцээд 35 гишүүний 33 нь огцруулахгүй гэж гарын үсэг зурсан. Харин МАН, МАХН-ын гишүүд Ерөнхий сайдыг огцруулах шалтгаан хангалттай байгаа гэдгийг онцолсон юм.
www.unen.mn
