Төр Төмбөгөр
Улс орны хөгжил хаанаас эхлэх вэ? гэсэн асуултад нэгэн эрдэмтэн хариулжээ. Тэрээр хэлэхдээ “улс орны хөгжил гэдэг иргэний хөгжлөөс шууд хамааралтай ба хүн нь хүнээ хайрладаг болсон тэр цагт хөгжил өөрөө ирсэн байдаг” хэмээн тодорхойлсон байдаг. Тэгвэл сүүлийн жилүүдэд Монгол залуус нэгдэн нийлж, сайн үйлс сайхан сэтгэлийн элчээ түгээж, түүчээлэн үргэлжлүүлсээр байна. Галаас дүүгээ аварч бүтэн гэр бүлээ авч үлдэж чадсан баатарлаг хүүгийн эмчилгээний зардал, Бөмбөгөр зах дээр цай зардаг Хорлоо эмээг байшинтай болгосон гээд олон арван сайн үйлсийн гэрч нь бид болсон. Эндээс Монголчууд нэгнээ хайрлах сэтгэл хэзээ ч бөхөөгүй гэдгийг харж болно. Тэгвэл саяхан Ц.Халиун гэх эгэл жирийн нэгэн оюутан эмэгтэй өөрийн боломж бололцоогоороо энэ сайн үйлсийн цувааг үргэлжлүүлсэн нэгэн сайхан мэдээг олж харлаа. Тэрээр бидний хэлж заншсанаар Улаан чулуутын хогийн цэгт ажиллаж амьдралаа залгуулдаг олон арван хүнд сэтгэлийн дэм хайрлаж нэгэн өдрийг тэдэнтэй хамт өнгөрүүлснээ өөрийн цахим хуудсандаа байршуулжээ.
Тэрээр хэлэхдээ:
Улаан чулуутын хогийн цэг дээр амьдардаг хэсэг иргэд болон ойролцоох амьдралын боломжгүй 300 орчим хүмүүст өөрийн чадлын хэрээр тус дэм болохыг эрмэлзлээ. “Аз жаргалд хүрэх алхам” лекц маань болон тэдэнд зориулсан оройн хоол,зохион байгуулсан үйл ажиллагаа бага ч атугай дэм болсон гэдэгт найдаж байна.Тусалж дэмжсэн найзууд болох Нандинцэцэг,Энхболд,Цэгмид нартаа маш их баярлалаа. Гүн хар нүхэнд унасан ч мацаад гарах сэтгэлийн тэнхээтэй байх хэрэгтэй… хэмээжээ.
Монгол хүний сайхан сэтгэл, саруул ухаан үргэлж ийнхүү өөдөө байг. Чин сэтгэлийн тус хэзээ ч багаддаггүй гэдгийг эрхэм уншигч танд сануулах нь зүйтэй болов уу. Сайхан сэтгэлт Монгол хүн танд сайн сайхныг хүсч Амьддаа бие биеэ хайрлахыг уриалж байна.
