Төр Төмбөгөр
Засгийн газраас иргэдийг орон сууцжуулах, эдийн засгийн хүндрэлийн үед барилгын салбарынхныг дэмжиж, эрэлт, нийлүүлэлтийг тэнцвэржүүлэх зорилгоор олон ажил хийж буй. Эдгээр ажлуудынх нь нэг нь иргэдийн зээлээр худалдан авч байгаа орон сууцны урьдчилгаа төлбөрийн 20 хувьд төр баталгаа гаргахаар шийдсэн.
Гэхдээ уг зээлийг олгож эхлээгүй байгаа билээ. Харин холбогдох яамны сайдын зүгээс хийгдэх ажлууд дуусч хөгжлийн банк, Монгол банктай хамтарсан гэрээгээ байгуулчихвал шууд хэрэгжиж эхлэх гэнэ. Энэ талаар Барилга, Хот Байгуулалтын Сайд Д.Цогтбаатар “Өнгөрсөн долдугаар сард засгийн газраас журамтай
холбоотой бүх шийдвэрийг гаргасан. Тэгэхээр Барилга, Хот Байгуулалтын Яамны зүгээс шалтгаалах зүйл одоо байхгүй. Хамгийн гол нь одоо дараагийн шатны байгууллагууд шийдвэрийг хэрэгжүүлнэ. Мөн 5 яам харилцан тохиролцсон учраас гэрээний зарим хэсэгт засвар хийж, гарын үсэг зурах л ажил үлдсэн. Түүнчлэн үлдэгдэл 20 хувийн баталгааг гаргаж буй Монгол Улсын Хөгжлийн Банкны зүгээс бусад банкуудтай гэрээ байгуулна. Эдгээр шат дараалсан ажлын дараа журам хэрэгжиж эхэлнэ. Өөрөөр хэлбэл, хоногоор тоологдох багахан хугацаа үлдсэн гэсэн үг” гэсэн юм.
Мөн 80 ам.метрийн асуудал засгийн газрын хэмжээнд шийдэгдэх ажээ. Өмнө батлагдсан журмууд нь бүгд засгийн газрын түвшинд хийгдсэн болохоор 80 ам.метрийн асуудлыг мөн авч хэлэлцэх юм байна. Энэ нь эдийн засаг хямарсан үед авч байгаа арга хэмжээ учраас нэг үйлдлээр бүх зүйлийг шийдвэрлэхэд эрсдэл үүсэх магадлалтай гэнэ. Тиймээс хэрэгжилтийг шат дараатай явуулж, 10 дугаар сарын нэгнээс өөрчлөлт оруулах юм байна. Үүнээс үзэхэд, 80 ам метр хүртэлх хэмжээтэй байр авч байгаа иргэд 10 хувийн урьдчилгаатай зээл авах бүрэн боломжтой аж.
