Төр ТөмбөгөрӨнгөрсөн долоо хоногт олон улсын хөлбөмбөгийн холбооны толгой байгууллага ФИФА-гийн өндөр эрх мэдэл бүхий албан тушаалтнууд ихээхэн хэмжээний авлигын хэрэгт холбогдон баривчлагдсан билээ. Тодруулбал, ихэнхи нь шинэ, хуучин захирлуудаас бүрдсэн 18 хүнийг 100 сая фунт стерлингийн авлига авсан хэмээн үзэж байгаа юм.
Энэхүү хэрэгт ФИФА-гийн өнөөгийн Ерөнхийлөгч Зепп Блаттер хамааралгүй хэмээн мэдээлж байсан. Авлигын хэргийн дуулианаас хоёр хоногийн дараа буюу өнгөрсөн баасан гарагт ФИФА-гийн Ерөнхийлөгчийн сонгуульд болж швейцарь эр Зепп Блаттер дахин сонгогдсон билээ.
Гэтэл өнгөрсөн амралтын өдөр Английн хамгийн том хэвлэлүүдийн нэг “Dailymail”-д Зепп Блаттер авлига авсан байж болзошгүй гэсэн нийтлэл хэвлэгджээ. Хамгийн сонирхолтой нь энэхүү авлигын хэрэгт манай улсын Ерөнхийлөгч Ц.Элбэгдоржийн нэр яригдсан байна.
Хэвлэлд “Авлигын хэрэгт холбогдоогүй бөгөөд өнгөрсөн баасан гарагт дахин сонгогдсон Зепп Блаттераас ёс зүйн асуулт асуух ёстой” хэмээн бичжээ. Учир нь тэрээр хэдийгээр бусад ФИФА-гийн захирлуудын адил дэлхийн хэмжээний тэмцээн зохиох эрхийг улс орнуудад олгохдоо авлига аваагүй ч гэлээ 35 жилийн дараах хөлбөмбөгийн ДАШТ-ийг аль улс зохион байгуулахад нөлөөлөхийг оролджээ гэжээ. Тодруулбал, Зепп Блаттер 2050 онд Монгол Улсад хөлбөмбөгийн ДАШТ зохион байгуулна гэх амлалт маягийн зүйлийг Ерөнхийлөгч Ц.Элбэгдоржтой үзэглэсэн байна.
Энэхүү амлалтыг Ерөнхийлөгч Ц.Элбэгдорж Цюрих хотноо айлчлах үед буюу 2011 оны нэгдүгээр сарын 26-нд үзэглэжээ. “Хананд өлгөөтэй байгаа энэхүү амлалт хөлбөмбөгийн хувьд маш өчүүхэнд тооцогдох энэ үндэстэнг 2050 онд спортын хамгийн том тэмцээнийг зохион байгуулна хэмээн бичжээ” гэж “Dailymail” онцолсон байна. Түүнчлэн амлалтанд Монгол Улсыг 2042, 2046 онуудад Дэлхийн цомын тэмцээнийг зохион байгуулах санал оруулахыг уриалсан байжээ. Мөн 2035 онд Азийн цомын тэмцээнийг ч тус улсад зохион байгуулах боломжтой хэмээн биччихэж.
ФИФА-гийнх гэхэд цэцэрлэгийн хүүхэд зурсэн гэмээр харагдах энэхүү амлалтыг барууныхан өчигдөр л мэдэж баахан шуугив. Гэтэл Монгол Улсад энэ тухай аль хэдэн жилийн өмнө бөөн дуулиан болгож байлаа. Хэвлэлүүд “Ерөнхийлөгч Ц.Элбэгдорж ФИФА-гийн Ерөнхийлөгчтэй 2050 онд хөлбөмбөгийн ДАШТ-ийг Монголд зохионо гэж МӨРӨӨДЛИЙН ГЭРЭЭ байгуулсан” хэмээн шуугиж, тэр бүү хэл 35 жилийн дараах тэмцээнд бэлдэх баг, ТББ байгуулснаа ч зарлан тунхаглаж байлаа.
Гэтэл орчин үеийнх гэхэд итгэмгүй паламастераар дармалдаж бичсэн энэхүү амлалтыг дөнгөж мэдсэн барууныхан Зепп Блаттер Ц.Элбэгдоржоос авлига авсан уу хэмээн хардаж байна.
Гэтэл орчин үеийнх гэхэд итгэмгүй паламастераар дармалдаж бичсэн энэхүү амлалтыг дөнгөж мэдсэн барууныхан Зепп Блаттер Ц.Элбэгдоржоос авлига авсан уу хэмээн хардаж байна. Учир нь ФИФА-гийн Ерөнхийлөгч 35 жилийн дараах дэлхийн томоохон тэмцээнийг аль улс зохион байгуулах эрхийг дур мэдээд өгчихгүй нь хэнд ч ойлгомжтой юм. Мөн Ерөнхийлөгч Ц.Элбэгдорж 2013 оны Ерөнхийлөгчийн сонгуульд энэхүү мэдээллийг урдаа барин пиар хийсэн байж болохыг ч хэвлэлийнхэн анзаарчээ. Тиймээс л Зепп Блаттер үнэхээр авлигын хэрэгт холбогдоогүй цэвэр хүн мөн үү? гэдгийг дахин дахин асууж байна.
Одоогоор ФИФА болон Монголын хөлбөмбөгийн холбоо энэхүү мэдээлэлд хариу өгөхгүй байна.Ямартаа ч ФИФА-гийн Ерөнхийлөгчийг удахгүй бичмэл амлалтандаа тайлбар хийхийг шаардаж, авлигын хэргээр шалгах нь тодорхой боллоо. Олон улсын авлигын хэрэгт манай Ерөнхийлөгчийн нэр л битгий оролцоосой.
Хөлбөмбөгийн рэйтингээрээ дэлхийд 200-д бичигддэг Монгол Улсад ийм амлалт өгөх нь байж болохгүй хэрэг гэжээ.
Гараар дармалдаж жаазалсан энэхүү амлалт Монголын хөлбөмбөгийн холбооны байрны хананд одоо ч өлгөөстэй байгаа.
Ц.Элбэгдорж, Зепп Блаттер нар Монгол талаас МӨРӨӨДЛИЙН ГЭРЭЭ, Блаттерын хувьд АМЛАЛТ-аа батласны дараа. 2011 оны 1 сарын 26-нд.
Д.Идэр
www.24tsag.mn
