Төр Төмбөгөр
Хэл ам дагуулсан “Чингис” бондын санхүүжилтээр, Засгийн газраас хэрэгжүүлсэн “Гудамж” төслөөс “Туулын хурдны зам” төслийн замын ажлыг өнгөрсөн 2013 онд эхлүүлнэ гэж мэдэгдсэн.
Энэ ажлын хөрөнгө мөнгө багагүй шийдэгдсэн ч ажил нь удааширалтай байгааг тал талын мэдээллээс авч үзвэл “Их Майдар” эко хотоос болсон бололтой. Тодруулбал, “Женко” Х.Баттулгаас болж энэ ажил хойшилсон гэдгийг эх сурвалж хэллээ.
“Туулын хурдны зам”-ын бүтээн байгуулалтыг эхлүүлэхэд саад болж байгаа бас нэгэн асуудал нь Төв аймгийн Сэргэлэн сумын нутагт баригдахаар яригдаж буй “Майдар эко хот”-руу хурдны замыг тавиулахаар төлөвлөснөөс замын трассыг дахин судлах, батлах зэргийг дахин хийхээс өөр аргагүй болсон байна. Өөрөөр хэлбэл, зарим нэг эрх мэдлтнүүдийн эрх ашгаас болж хурдны зам барих ажил бас багагүй хугацаанд саатах бололтой.
Харин энэ тухайд “женко”-гийн хүн гэх Барилга хот байгуулалтын дэд сайд Г.Байгалмаагаас тодруулахад “Хурдны зам тавих асуудал Засгийн газарт эцэслэгдэх шатандаа яригдаж байгаа. Замын трассыг батлахдаа хаагуур, хэрхэн тавьж газар чөлөөлөлт, бүтээн байгуулалтыг уялдуулах вэ гэдэг нь бас томоохон асуудал юм. Шинээр тавих хурдны зам нь өөрөө Богд уулыг ороосон тойрог байдалтай баригдах тул “Майдар эко” хотыг дайрч өнгөрөхөөр шинэ трасс батлагдсан байгаа. Шинэ трассыг хэлэлцэж байж Засгийн газраас эцэслэнэ” гэжээ.
Төмөр зам барих асуудал ярихаар хэрэлдэж л суудаг, эсвэл төслийг нь дараад хэвтчихдэг, “Шинэ сум” төсөл гэхээр ганцаараа эзэгнэхийг хүсэх гээд бүхий л том төсөлд өөрийгөө гол дүр хэмээн боддог Х.Баттулга ер нь ямар санаатай нөхөр вэ. Одоо хурдын зам тавих ажилд саад болж байгааг бид харж байна. Өөрийгөө бүтээн байгуулагч хэмээн зарлах дуртай Х.Баттулга ингэхэд бүтээгч үү, сөнөөгч үү.
Н.Дөл
Эх сурвалж: www.unen.mn
