Хөшигийн хөндийд казино байгуулна

Засгийн газраас Казиногийн тухай хуулийн төслийг өргөн барихад бэлэн болоод буй. Харин казино тоглоомын газрыг хаана байгуулах талаар тодорхой мэдээлэлгүй байгаа. Тэгвэл эх сурвалжийн мэдээлснээр казино тоглоомын үйл ажиллагааг олон улсын нисэх буудлаа ашиглан Хөшигийн хөндийд олгохоор ярилцаж эхлээд байгаа аж. Ирэх онд тус хөндийд ашиглалтад орох олон улсын нисэх буудлын ойролцоо казино байгуулах нь эдийн засгийн хувьд ашигтай гэж үзсэн гэнэ. Өнөөдрийн байдлаар Алтанбулагийн чөлөөт бүсэд казино байгуулах мэдээлэл гарч байгаа ч эхний ээлжинд Хөшигийн хөндийд байгуулахаар тогтоод байгаа бололтой.

Түүнчлэн манай улсын иргэд казино тоглосон тохиолдолд маш өндөр төлбөртэй байх учраас ихэвчлэн гадны иргэд ирж тоглоно гэж тооцоолон нисэх онгоцны буудлын ойролцоо барих нь эдийн засгийн хувьд ашигтай гэж үзэж байгаа юм байна. Олон улсын стандартад нийцсэн казино тоглоомын үйл ажиллагааг эрхлэхтэй холбогдсон харилцааг зохицуулах, зохих ёсны хязгаарлалттайгаар зөвшөөрөх, төрийн зүгээс тавих хяналтын тогтолцоо, арга механизмыг тодорхой болгох үүднээс Засгийн газраас Казиногийн тухай хуулийн төслийг боловсруулаад байгаа. Тус хуулийн төсөлд Монгол Улсын нутаг дэвсгэр дээр казиногийн үйл ажиллагаа эрхлэх болзол, казино болон тусгай зөвшөөрөл эзэмшигчдэд хориглох болон бусад үйл ажиллагаатай холбоотой төрийн зохицуулалт, бүрэн эрх, хяналтын тогтолцоог бий болгохтой холбогдсон харилцааг тусгасан байна.