М.В.Ломоносовын нэрэмжит Москвагийн Улсын Их Сургуулийн 260 жилийн ой тохиож байна

М.В.Ломоносовын нэрэмжит Москвагийн Улсын Их Сургууль нь 1755 онд суут эрдэмтэн, Оросын анхны академич Михаил Васильевич Ломоносовын санаачилгаар байгуулагдсан бөгөөд 3 факультетаас (гүн ухаан, хууль зүй, анагаах ухааны) бүрдэж байсан юм. Тэр үеэс хойш бүрэлдэхүүн сургуулиудын тоо нэмэгдсээр ирсэн ба өнөөдөр тус сургууль нь 39 факультет, 15 институт, 23 судалгааны төвтэй болоод байна.  Москвагийн Улсын Их Сургууль нь зүй ёсоор ОХУ-ын хамгийн ууган их сургууль, тэргүүний шинжлэх ухаан, судалгааны төвд тооцогддог бөгөөд өнөөдрийн байдлаар 128 мэргэжлээр оюутнуудыг бэлтгэж, 168 мэргэжлээр магистрантур болон докторантын сургалтыг явуулж байна. Өнөөдрийн байдлаар тус сургуульд   40 000 хүн суралцдаг юм байна.

Москвагийн Улсын Их Сургууль нь Евразийн их сургуулиудын холбооны гишүүн бөгөөд дэлхийн 60 гаруй улс орны судалгааны төвүүд болон их сургуулиудтай хамтын  ажиллагааны гэрээ байгуулсан байна. Москвагийн Улсын Их Сургуулийг Монголчууд 1949 оноос эхлэн төгссөн бөгөөд одоогоор нийтдээ 400 гаруй хүмүүс төгссөн.  Москвагийн Улсын Их Сургуулийг 1950-1960 оны төгсөгчид Монгол улсад шинжлэх ухааны бүх чиглэлийн хөгжлийн эх суурийг тавилцсан бөгөөд үе үеийн төгсөгчид  нь орчин үед үргэлжүүлэн эрчимтэй хөгжүүлж байна.

Жил бүрийн 1 сарын 25-ны өдөр буюу “Татьяна”-гийн өдрөөр тус сургуулийн байгуулагдсан өдрийг тэмдэглэдэг заншилтай юм. Харин энэ жил М.В.Ломоносовын нэрэмжит Москвагийн Улсын Их Сургуулийн 260 жилийн ой тохиож байгаа учир энэ жилийн энэ өдөр илүү их ач холбогдолтой болж байгаа билээ. Иймээс Д.Жаргалсайхан тэргүүтэй тус сургуулийн монгол төгсөгчдийн холбооноос үе үеийн төгсөгчдиййг цуглуулсан ойн баярын арга хэмжээг зохион байгуулах гэж байгаа бөгөөд энэхүү арга хэмжээ нь 2015 оны 1 сарын 24-ний өдрийн 17 цагаас Улаанбаатар зочид буудалд болох гэж байна.