Төр Төмбөгөр
Монгол Улсын төрийг хууль бусаар, хөрөнгө мөнгөөр худалдаж авахаар тохиролцсон “60 тэрбум”-ын эзэд үнэнд гүйцэгдэж эхлэв. УИХ-ын 2016 оны сонгуулийн өмнө задарсан 90 минутын турш үргэлжлэх, 60 тэрбум төгрөг босгох тухай Ц.Сандуй нарын яриа нь эрүүгийн гэмт хэргийн шинжтэй, албан тушаалыг наймаалсан, төрийн эрхийг хууль бусаар авахаар санаархсан гэж үзэх бүрэн үндэстэй билээ.
Өнөөдөр тэднийг хууль шүүхийн байгууллага шалгаад зогсохгүй МАН дотооддоо намаа цэвэрлэх талаасаа ч эрүүгийн болоод ёс зүйн хариуцлага хүлээлгэх нь нэгэнт тодорхой болжээ.
Монгол Улсын Ерөнхийлөгч Х.Баттулга хоёр хоногийн өмнө АТГ-ын дарга нартай уулзахдаа, “60 тэрбум”-ын бичлэг хийгээд түүнийг зохион байгуулсан гэмт этгээдүүдтэй хариуцлага тооцохыг хатуу сануулсан билээ. Х.Баттулга ерөнхийлөгчийн амлалт хийгээд ард түмэн түүнээс хүлээж буй хүлээлт нь “60 тэрбум”-ын хэргийг үнэн зөвөөр шийдвэрлэх явдал юм. Өчигдөр Улсын Ерөнхий прокурорын газраас “60 тэрбум”-ын бичлэгтэй холбоотой асуудлыг эрүүгийн хэрэг үүсгэн шалгахыг АТГ-т даалгалаа. Улмаар прокурорын байгууллагаас Авлигатай тэмцэх газар, Цагдаагийн Ерөнхий газар, Тагнуулын Ерөнхий газрын хамтарсан ажлын хэсэг томилон шалгах үүргийг өгчээ. Хэн юуны тухай, ямар ашиг сонирхол, төрийн эрх мэдлийг булаан авах тухай ярьсан, хэлэлцсэн нь нэгэнт тодорхой учраас хуулийн өмнө буруудаж таарна. Хаашаа ч бултах аргагүй баримт, нотолгоо бий.
Харин Ерөнхийлөгчийн сонгуульд ялагдал хүлээсэн МАН ялагдлын гол шалтгааныг 60 тэрбумын бичлэг, түүнийг зохион байгуулсан эздүүдийг гэж буруутгаж байна. Ингэж үзэх нь ч үнэний ортой. Авлига, албан тушаалын наймаагаа ил цагаан ярьж суугаа намын удирдлагуудад ард түмэн итгэл хүлээлгэнэ гэж үгүй. Тийм учраас МАН-ын нэр дэвшигчид ард түмэн дүн тавьсан. МАН-ынхан намаа шинэчлэхийн тулд авлига албан тушаалын хэрэгтнүүд, 60 тэрбум төгрөгийн санаачлагчдаас салахыг хүсч байна.
МАН-д тэдэнтэй тэмцэх хөдөлгөөн хүртэл өрнөж байна. УИХ-ын гишүүн, Т.Аюурсайхан, Л.Оюун-Эрдэнэ, Ж.Энхбаяр болон МАН-ын жирийн гишүүд “60 тэрбумаас намаа цэвэрлэе” хөдөлгөөнийг байгуулсан. УИХ-ын гишүүн Л.Оюун-Эрдэнэ “Төрийн албыг арилжсан 60 тэрбумынхнаас намаа цэвэрлэхийн төлөө хатуу тэмцэнэ” гэдгээ мэдэгдээд байна.
“Жаран тэрбум”-ын авторуудыг намаасаа цэвэрлэж авлига, албан тушаалын гэмт хэрэгтнүүдтэйгээ тэмцсэнээр шинэчлэлийн эхлэлийг тавина гэж үзэж байна. МАН төрийн эрх мэдлийг худалддаг, авлига авдаг албан тушаалтнуудаасаа салж байж нэр цэвэр үлдэх учраас намаасаа шахаж гаргах хүсэл сонирхол залуучуудын дунд хүчтэй оволзож байгаа аж. Удахгүй болох МАН-ын Бага хурал, Их хурлаараа тэдэнд хариуцлага тооцох тухай яригдаж байна.
Цагдаа, прокурор, хуулийн байгууллага Ц.Сандуй нарыг эрүүгийн хэрэг үүсгэн шалгахаар болж, харин нам дотор нь тэднийг суудлаас нь хөөж явуулахыг юу юунаас хүсч байгаа ажээ. Тэгэхээр Ц.Сандуй нар хуулийн байгууллага хийгээд намынхандаа шахагдаж, “нуман тулгуурт” оржээ Тэднийг ганц хууль шүүх, МАН-ын гишүүд бус ард түмэн ч шүүхийг хүсч байна.
Т.Түвшин
ZINDAA.MN
