Төр Төмбөгөр
Хүний хөгжил сангийн тухай хуулийн 15 дугаар зүйлийн 15.3 дахь хэсэг, Хүний хөгжил сангийн 2016 оны Төсвийн тухай хууль, УИХ-ын 2015 оны 11 дүгээр сарын 13-ны өдрийн 103 дугаар тогтоолыг тус тус үндэслэн Засгийн газраас Хүний хөгжил сангаас хүүхдэд мөнгө олгох журамд нэмэлт, өөрчлөлт оруулсан билээ. Улмаар өрхийн амьжиргааны түвшний 20 бүлгийн 1-17 бүлгийн өрхийн 0-18 насны хүүхдэд олгохоор шийдвэрлэсэн юм. Дээрх журам энэ сараас хэрэгжиж эхэлсэн.
Хүүхдүүдийг ялгаварлахгүйгээр хүүхдийн мөнгө олгохоор болсон талаар мэдээллээ
Олон нийтийн зүгээс энэхүү асуудалд шүүмжлэлтэй хандаж байсан юм. Харин Монгол Улсын Ерөнхийлөгч Ц.Элбэгдорж хүүхдүүдийг ялгаварлахгүйгээр хүүхдийн мөнгө олгохоор болсон талаар мэдээлэв. Тэрбээр өөрийн фэйсбүүк хуудсаараа дамжуулан “Хүүхдийн мөнгөний тухай олон хүн хандаж анхаарахыг хүссэний дагуу УИХ-ын дарга, Ерөнхий сайдтай ярилцлаа. Хүүхдийн мөнгийг өмнөх жишгийн дагуу олгох нь зүйтэй гэж санал нэгдлээ. Зохих шийдлийг гаргах чиглэлд ажиллахаар боллоо. Хүүхдийн мөнгө бол Монголчууд олуулаа, эрүүл өсч торниход чиглэсэн Монгол улсын бодлого юм” хэмээн цахим хуудаснаа нийтэлсэн байна.
