Засаг дарга нь байгаль хамгаалагчидтайгаа нийлэн хүрэн баавгай агнаж байгаад баригдлаа

2015.10.12-ны өдөр Баян-Өлгий аймгийн Алтай сумын нутагт, хилийн бүсэд орших байглийн үзэсгэлэнт “Ёлт” гэдэг газраас Алтай сумын байгаль хамгаалагч Б, “Ёлтын тусгай хамгаалалттай газрын улсын байцаагч С, Алтай сумын 3 дугаар багийн засаг дарга Ш нар тус сумын иргэд болох М, С, Д нарын хамт бүлэглэн нэн ховор амьтан болох хүрэн баавгай агнасан байна. Тэднийг ХХЕГ-ын хилийн 0165 дугаар ангийн дугаар заставын эрэл хайгуулын бүлэг илрүүлсэн байна. Тэднийг саатуулах үед ангийн зориулалт бүхий “Сайга”, “Карбин”, “СКС” зэрэг буу, баавгайн арьс, мах зэргийг хурааж авсан аж. Уг хэргийг ЦЕГ-ын Баян-Өлгий аймаг дахь Цагдаагийн газраас шалгаж эхлээд байна.

Хүрэн баавгайн экологи, эдийн засгийн үнэлгээ нь 6.5-7.5 сая төгрөг байдаг бөгөөд агнасан тохиолдолд гурав нугалж торгохоор хууль заасан байдаг. Тэгэхээр 19 500 000-22 500 000 төгрөгийн торгууль төлөх юм байна.

Харин эрүүгийн хэрэг үүсгэсэн тохиолдолд Эрүүгийн хуулийн 203 дугаар зүйл. Ан агнуурын тухай хууль тогтоомж зөрчих гэсэн зүйл ангийн дагуу шалгана. Тодруулбал, Эрүүгийн хуулийн

203.1.Улсын тусгай хамгаалалттай газар нутагт болон хориотой үед, хориглосон арга, зэвсэг, хэрэгслээр ан амьтан агнасан, барьсны улмаас үлэмж хэмжээний хохирол учирсан, ховор ан амьтанг зохих зөвшөөрөлгүйгээр агнасан, барьсан, тэжээж гаршуулсан,тэдгээрийн түүхий эдийн зүйлийг хадгалсан, худалдсан, худалдан авсан, тээвэрлэсэн бол хөдөлмөрийн хөлсний доод хэмжээг тавин нэгээс нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ.

203.2.Энэ хэргийн улмаас их буюу онц их хэмжээний хохирол учирсан, нэн ховор ан амьтан агнасан, барьсан бол хөдөлмөрийн хөлсний доод хэмжээг нэг зуун тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас дээш таван жил хүртэл хугацаагаар хорих ял шийтгэнэ хэмээн заасан байдаг.

Тэгэхээр дээрх нөхдүүд торгууль төлөх эсвэл таван жил хүртэлх хугацаагаар торгуулах юм байна. Харин мэргэжлийн ёс зүйгээ зөрчсөн тэднийг үүрэгт ажлаас нь чөлөөлөх эсэхийг томилсон засаг ноёд нь шийдэх юм.

А.Баярмаа