Александр Шепс: Толины хажууд яагаад зургаа авахуулж болохгүй вэ

ОРОСЫН ЗӨН БИЛГИЙН ТУЛААН 14-ИЙН ЯЛАГЧ АЛЕКСАНДР ШЕПСИЙН СОНИРХОЛТОЙ ЗӨВЛӨГӨӨНҮҮД 

ТОЛИНЫ ХАЖУУД ЯАГААД ЗУРГАА АВАХУУЛЖ БОЛОХГҮЙ ВЭ? 

“Зөн билгийн тулааны” 14 дэх удаагийн ялагч Александр Шепс фото зурагны далд шид, зураг авахуулах “хоббитой” хүмүүст ямар гээч аюул нүүрлэж болох тухай анхааруулж байна. Фото зураг нь хайртай хүндээ хор учруулж ч болох асар их хүчтэй энерги агуулдаг болохыг камерын өмнө элдэв янзаар дүрээ мөнхлөх гэж хичээдэг нэгэн олж уншаад гайхаж цочих нь лавтай. Зөн билэгчийн хэлж байгаагаар толь болон фото зураг нь далд шидийн асар их хүчтэй тул энэ хоёр аюулыг зэрэгцүүлж, улам их аюул бөөгнөрүүлэхийн хэрэг юу билээ?!

Толины хажууд зураг авахуулж байгаа үедээ хүн элдэв аюул, хар цагаан хэл аманд өртөхөөр их эмзэг орон зайд ордог. Зураг авахуулах үеийн бие махбодь, бодол ухаан, хүсэл тэмүүлэл, сэтгэл хөдлөлийг хадгалж үлддэг. Яг энэ цаг мөчид хүний сэтгэл санаа, сүнс сүлд бүгдээрээ “нээлттэй” бас их эмзэг мэдрэмтгий болсон байдаг тул танд муу санадаг, санадаггүй хэн ч зургийг тань харангаа магадгүй санаатайгаар биш ч нүдний хор унаган, атаархана.

Түүнээс гадна фото зураг болон толь өмнөхөөсөө ч дутуугүй өөр нэг аюултай. Толь хуримтлагдсан бүх мэдээллүүдээ хадгалсаар, Александр Шепсийн хэлж байгаагаар ихэнх толь асар их хэмжээний сөрөг энергийг хуримтлуулж цуглуулсан байдаг. Ингээд толинд харангаа энэхүү орон зайд орж гарсан хүмүүсийн сэтгэл хөдлөл, мэдрэмж, санаа бодол, элдэв мэдээлэлтэйгээ хамт он жилийн уртад шингээгдсээр, эерэг сайнаасаа илүүтэй сөрөг муу энергийн “цөмийн бөмбөг” шиг болно.

Иймд толины хажууд зураг авахуулснаар дүр нь тэрхүү бөөн сөрөг мэдээллийн ”эх үүсвэртэй“ хамт мөнхлөгдөж сэтгэл санааны тогтворгүй байдал, өвчин эмгэг, амьдралд азгүйтэл, бүтэлгүйтлийг дагуулдаг байна. Толины хажууд авахуулсан зураг тэр хүний ажил амьдрал, албан тушаал, эргэн тойрны хүмүүсийн хоорондын харилцаанд гээд аливаа бүхэнд зөвхөн сөрөг муугаар нөлөөлсөөр эцэст нь хувийн амьдралыг нь сүйтгэхээс гадна, хамгийн гол нь тухайн хүний сэтгэл санааг нэг мөр үгүй хийнэ. Хэрвээ энэ хүн энергийн хувьд ямар нэг хамгаалалтгүй бол аажим алгуураар эрүүл мэнд, сэтгэл санааны байдал нь улам бүр суларч муудсаар л байх болно.

Александр Шепс зураг бүр дээр хүний сүнс сүлд, сэтгэл санааны өчүүхэн бага ч гэсэн хэсэг хэлтэрхий үлдсээр байдаг тул байнга зураг авахуулахгүй байхыг анхааруулж байна. Түүнээс гадна өвчтэй хүнийг унтаж байхад нь зургийг нь авч болдоггүй гэнэ. Унтаж байгаа хүний зурган дээрх дүр тухайн хүний энергийн бүрхүүлийг сулруулснаар хар муу юманд өртөмтгий болно. Хэрвээ удтал өвдсөн хүн зургаа авахуулсан бол тэрээр хэзээ ч эдгэрэхгүй эрсдэлд орж байгаагийн шинж гэнэ. Зургийн хальс түүний өвдөж шаналсан дүр, сөрөг энергийг хадгалж үлдэх тул эдгэрэх тухайг эргэлт буцалтгүйгээр мартах нь бололтой.

Александр Шепс өөрөө өмнө нь мэргэжлийн фотомодель байсныг санаж байна уу? Тэрээр асар олон удаа зураг авалтанд оролцох шаардлагатай болдог байсан ч тэр үед тэр далд ертөнцтэй холбоотой өнөөгийн ажлаа хийж байгаагүй тул энэхүү зурагнууд хожмын амьдралд нь хэрхэн яаж нөлөөлөх тухай бодож ч байгаагүй гэнэ.

АЖИЛ, АЛБАН ТУШААЛД АМЖИЛТ ДАГУУЛАХ САХИУС

Гялалзсан амжилтад хүрэхийг мөрөөддөг хүмүүст Александр Шепс нэлээд хэдэн ашигтай зөвлөгөө өгч байна. Бизнес, албан тушаалд амжилт дагуулдаг сахиус болгон ажил хэрэгч хүн бүрийн өдөр тутам хэрэглэдэг ердийн зүйлсийг ашиглаж болно гэдгийг сонсоход үнэхээр гайхахгүй байхын аргагүй. Хүний байнга хэрэглэдэг, дасаж сурсан аливаа эд зүйл онцгой энергитэй байдаг. Иймд ажилдаа амжилт дуудахад чухамдаа эдгээр зүйлсийг сонгож хэрэглэх нь хамгийн тохиромжтой тухай Александр Шепс өгүүлээд гагцхүү зарим нэг эд зүйлийн ид шидийн өвөрмөц мөн чанарыг мэдэж авах шаардлагатайг сануулж байна.

Үзэг. Зөвхөн сайны ерөөлтэйгөөр бэлэг болгон авсан үзэг л ид шидийн гайхамшигтай чанарыг агуулдаг гэнэ. Үзэг хэмээх энэхүү сахиусны хамаг хүч хурц үзүүртэй хэлбэрт нь оршдог. Таны сахиус аливаа нэг бодлогогүй алхам хийхээс сэргийлж чадна. Зөв сонголт хийж, шийдвэр гаргахын тулд эргэлзээнээсээ салах хэрэгтэй. Чухам ийм тохиолдолд та гартаа үзгээ эргүүлээрэй. Үнэн зөв шийдэл өөрөө толгойд тань ороод л ирнэ. Аз дагуулсан үзгээ биеэсээ салгаж болдоггүй. Аливаа бичиг баримт, гэрээ хэлцэлд зөвхөн энэ үзгээрээ гарын үсэг зурснаар ажил тань амжилттай, та өөрөө сэтгэл хангалуун аз жаргалтай байх болно.

Цаг. Ажил алба, бизнест амжилт хүсдэг хэнд ч цаг хамгийн хүчтэй сахиус болно. Ялангуяа даруухан, шийдэмгий бус хүмүүст өөртөө итгэх асар их итгэл төрүүлдэг хамгийн тохиромжтой сахиус. Түүнээс гадна цаг гэрээ хэлэлцээний явцад их таатай нөлөөлдөг гэлцдэг. “Хэрэгтэй хүнтэйгээ” харилцах явцад өөртөө илүү их боломж, хүссэн ашиг олж авахын тухайд том бугуйн цаг сахиус болгон зүүх хэрэгтэй гэнэ.

Тэмдэглэлийн дэвтэр ч нэг адил ид шидийн асар хүчтэй сахиус болж чадна. Өөрийнхөө ажлын өдрөө зохицуулж, хувиарлахдаа тааруу, аливаа ажлаа амжуулж чаддаггүй нэгэнд хамгийн тохиромжтой чухал зүйл. Хэрэгтэй зүйлдээ анхаарлаа төвлөрүүлж, бүтээлч сэтгэлгээгээ хөгжүүлэхэд энэхүү сахиус их үүрэгтэй байж чадна. Санаж сэдсэн, бодож төлөвлөсөн ажилдаа толгой нь эргэсэн уймраа нэгэнд хамгийн хэрэгтэй сахиус. Тэмдэглэлийн дэвтрийн тань цаасны энерги бүх ашигтай мэдээллийг цуглуулж, хэрэггүйг нь хасангаа эзэндээ төлөвлөсөн ажлаа бүтээхэд нь хамгийн шаардлагатай санааг өгөх болно.

Тоглоом. Жижигхэн тоглоом, өхөөрдөм хөөрхөн зүүлт эсвэл ямар нэг жижиг гоёл чимэглэлийн зүйл ажилд тань амжилт дуудаж болно. Ийм сахиус гэрээ хэлцэл хийх болон хүмүүстэй ярьж харьцах явцад их чухал үүрэгтэй. Хажууд тань сахиус байгаа цагт уулзалт, ярилцлага их амархан, элдэв саадгүй хүссэнээр тань аятайхан болж өнгөрнө. Ийм сахиусны эзэн өөрийнхөө хурц ухаан, хошин мэдрэмж, итгэл бишрэлдээ санаа зовохгүй амгалан байж болно. Харин ийм сахиус аливаад шийдэмгий биш, хариуцлагагүй, салан задгай, тогтворгүй зан араншинтай нэгэнд хэрхэвч зохихгүй. Эдгээр бүх сахиуснууд бизнес, ажил, албан тушаалд амжилт дуудна хэмээн Александр Шепс зөвлөж байна. Ажил хэрэгч хүнд зайлшгүй шаардлагатай чанаруудыг бүрэлдүүлэхэд туслан эцсийн дүнд таныг амжилтанд хүргэнэ. Гэвч сахиус ямар ч гайхамшигтай шидтэй ч байсан өөрийн тань зүгээс хичээл зүтгэл үгүй бол таны аливаа бүх асуудлыг шийднэ гэдэгт сохроор итгэх хэрэггүй. Хэрвээ хүн өөрөө л амжилтанд хүрэхийг хүсэж мөрөөдөн, хичээж зүтгэхгүй бол сахиус нь өөрийнхөө хэмжээ түвшиндээ оноогдсон үүргээ бас биелүүлж чадахгүйд хүрнэ гэдгийг санаарай. Сахиус зүүлт гэдэг эзэндээ зайлшгүй шаардлагатай чанаруудыг идэвхжүүлж, дэмжлэг туслалцаа үзүүлнэ. Харин үлдсэн бүхнийг нь та өөрөө хийж гүйцэтгэх ёстой.

МУУ ЁРЫН ЮМ ЯМАР ХҮНД ШИНГЭДЭГ ТУХАЙ

Александр Шепс хүмүүст энерги сорогч гэж хэн болох, хүнд ямар хор хохирол учруулдаг тухай өгүүлсэн юм. Ихэнхдээ хүмүүс өөрсдөө өөр лүүгээ муу юм дуудаж тогтоочихоод түүнээсээ болж шаналж зовж явдаг тухай өгүүлсэн.

Хараал хийдэг, хар муу юм үйлддэг хүмүүсийн элдэвлэл, нүдний хор, атаархал энэ тэр гэдэг хүнийг энергийн түвшинд хордуулахтай харьцуулахад тийм ч аймшигтай зүйл биш бололтой. Ид шидээс харьцуулшгүй илүү аюултай зүйл гэж бас байна. Энэ бол энерги сорогчид юм. Эдгээр хүний нүдэнд үзэгдэхгүй биес хүнд сөрөг нөлөө үзүүлэх гайтайгаас гадна амьдрах хүсэл сонирхлоо алдах, хүндээр өвдөх, сэтгэцийн хямралд ороход хүргэдэг. Эдгээр юмс өөр өөрсдийнхөө хэлбэр, өнгөөр ялгагддаг. Тэдгээрийн дунд хүнд эерэг нөлөөлдөг нь байдаг ч харамсалтай нь тийм ээлтэй сайн нь тун цөөхөн. Тэдний ихэнх нь хүний энергийг сорж тэжээгдэгчид.

Далд ертөнц нэг нь нөгөөдөө үзэгддэггүйн нэг адил тэдэнд ч бид харагдахгүй. Хүмүүс бид ч зэрэгцээ орших тэднийг олж харахгүй анзаарахгүй яваа. Хүн гэдэг мөн чанарынхаа хувьд асар их туяа цацраасан өтгөн зузаан энергийн бөөм цөм бөгөөд үл үзэгдэгч муу юмс бидний араас гэтэж энергийг маань сорон энергийн бүрхүүл болох аурад нь нэвтрэн өөрсдийнхөө өгөөш болгодог.

Энэ мэтээр сорон шимэхийн учир нь нөгөө ертөнцийн эдгээр шимэгчид хүний энергээр тэжээгддэг. Тэд хүний сэтгэл санааны тэнцвэртэй байдлыг алдагдуулж, ааш араншин, биеэ авч явах чадварыг нь өөрчлөн хувиргаж хамгийн эмгэнэлтэй хор хохиролд хүргэнэ. Энерги сорогчид тэр бүр хүнд хүрч ойртож чаддаггүй. Сөрөг энергитэй хүмүүсийг тэд өгөөшөө болгон сэмхэн гэтэцгээнэ. Энерги сорогчид бол байнга ямар нэг юманд сэтгэл дундуур үглэж гоморхон цухалдаж явдаг, атаач, өөрсдийгөө аливаа бүхэнд буруутгаж хувь заяандаа гутрагчид, эргэн тойрныхондоо үргэлж муу санан хардаж сэрдэн, хор хүргэгчид юм. Өөрөөр хэлэхэд үзэн ядалт, уур бухимдал, түрэмгийлэл, хар муу санаагаар дүүрэн хүмүүст үргэлж хор хүргэгчид. Хүн сөрөг муу бодол тээхийн хэрээр мөн чанар нь улам эрчимтэй идэвхжиж, илүү их хүчирхэг хорлонтон болсоор байдаг. Нөгөө ертөнцийн хар муу энерги сорогчид гарч ирэхэд хүмүүс бид өөрсдөө буруутан нь юм.

Энерги сорогчдоос хамгаалагдахын тулд Александр Шепс дараах хэдэн зөвлөгөөг өгч байна: Сэтгэлийн хаттай болж өөрийгөө захирч жолоодох чадвараа хөгжүүлэх. Нөгөө ертөнцийнхнийг өөртөө ойртуулахгүйн тулд бясалгал хийх зэргээр өөрийгөө байнга хөгжүүлж илүү дээд түвшинд хүрэх. Байнга маани мэгзэм уншиж залбирдаг хүн сүсэг бишрэлтэй хүмүүст ийм муу юмнаас хамгаалагдах илүү амар дөт байдаг. Нэмээд хэлэхэд мэдээж сөрөг муу бодол, хар хорын санаанаасаа салах хэрэгтэй. Александр Шепс нэг бус удаа энерги сорогчтой таарч явсан бөгөөд “Зөн билгийн тулааны” зураг авалтын үеэр ч ийм явдал гарч байжээ. Нэг удаагийн тулааны үеэр Москвагийн ойролцоох тосгоны нэг байшингаас ийм нэг хар хүчийг хөөж зайлуулах хэрэг гарсан юм. Энэ байранд сүнс, чөтгөр шуламнаас ч аюултай энерги сорогч амьдарч байгааг хэн ч тааж мэдэхгүй байлаа.

НҮҮРНИЙ ҮРЧЛЭЭ ӨНГӨРСӨН АМЬДРАЛЫН ТУХАЙ ӨГҮҮЛНЭ

Зөн билэгч Александр Шепс нүүрэн дэх үрчлээгээр нь хүний зан араншин болон өнгөрсөн амьдралын тухай ихийг өгүүлж болно гэнэ. Хүний амьдралын баяр гуниг гээд бүхий л үйл явдал нүүр царайн дээрээс нь харагддаг. Ингээд нүүрэн дэх үрчлээ зураасаар нь юуны тухай тайлж хэлж болох тухай ийнхүү өгүүлж байна.

Амны хоёр талын болон нүдний булан дахь үрчлээ илэн далангүй, нээлттэй зан чанарыг өгүүлэхээс гадна ахуй амьдралынх нь аливаа бүхэн амар тайван, сэтгэл тэнүүн яваагийн шинж гэнэ. Ийм хүний амьдралд ямар нэг таагүй зүйл тохиосон ч тэрээр сэтгэл санаагаар унаж сүйд болохгүйг хичээнэ.

Нүдний булан дахь үрчлээг зөн билэгч маань нэлээд онцлон “галууны сарвуу” хэмээн нэрлэгддэг энэхүү зураас нь байнга нүдээ анивчиж онийлгодогынх нь ул мөр гэнэ. Хэрвээ таны нүдний хараа хэвийн бол ийм зураас үрчлээг их анхаарал болгоомжтой, хянамгай чамбай хүний шинж гэж үздэг. Хэрвээ уруулыг хүрээлээд үрчлээ гарч ирсэн бол их нэрэлхүү, биеэ хамгаалах чадваргүй, даруу ноомойн шинж. Ийм хүмүүс өөртөө итгэлгүй, аливаад их шийдэмгий бус байдаг тул тэдэнд байнга тусламж дэмжлэг шаардлагатай болдог. Хоёр хөмсөгний хоорондох босоо зураас оюун ухааны өндөр чадамжтай, аливааг эргэцүүлж дүгнэдэг болохыг нь харуулдаг. Ийм хүмүүс амьдралын тухай эргэцүүлж, утга учир, мөн чанарын тухай нухацтай их уг суурьтай ярьж дүгнэдэг. Тэд онолдоод байхаасаа илүү хийж турших гэж хичээдэг. Хөмсөгөн дээгүүрх хэвтээ үрчлээ үнэнч шударга, хариуцлагатайн шинж. Александр Шепсийн хувьд ийм хүмүүс ямар ч зүйлд хамгийн итгэл даахаар надвартай хүмүүс байдаг. Духан дээгүүрх хэвтээ үрчлээ сэтгэл сайхантай, өр нимгэнтэйн шинж. Ийм хүмүүсийн өнгөрсөн амьдрал их амаргүй байсан хэдий ч өөрийнхөө итгэл үнэмшилдээ үнэнч, өөртөө зөвөөрөө үлдсэн байдаг. Хэрвээ духан дээрх хэвтээ үрчлээ жижигхэн тасархай хэсгүүдээс бүтсэн, чиг шугам нь бага зэрэг балархай байвал тухайн хүний зан араншингийн тогтворгүй байдлыг гэрчилнэ. Ийм хүмүүсийн амьдралд эргэлзэж тээнэгэлзэх асуудал тун их байдаг бөгөөд нэг талаас нөгөө үрүү савлахын нэг адил амьдралаас чухам яг юу хүсээд байгаагаа мэддэггүй.

Хэрвээ хамрын самсайнаас амны булан хүртэл үрчлээтсэн бол энэ хүний өнгөрсөн амьдралд сэтгэлийн харуусал шаналал их байсны шинж. Магадгүй өөрийнхөө хүссэнийг энэ амьдралаас олж авч чадаагүй ч байж болох юм. Самсаа дагасан зураас нүдний дотор булан хүрч байвал боломжоо ашиглан хүсэл мөрөөдөлдөө хүрсний шинж. Гэтэл ийм зураас нь хамрын самсаанаас завьж уруу доош чиглэсэн байвал энэ хүн өнгөрсөнд бие махбодын асар хүнд ачаа тээж явсныг өгүүлнэ. Хөмсөгөн дээгүүрх өнцөг булантай мэт үрчлээ хүний түрэмгий зан араншин, сэтгэл санаа тайван биш байгааг харуулна. Ийм үрчлээтэй хүмүүс их амаргүй хүнд зан ааштай байдаг. Тэдний өнгөрсөн амьдралд олон тооны алдаа, дүрсгүйтэл бүтэлгүй явдал байдаг болохоор эргэн тойрны хүмүүсийнхээ дунд таарч зохицох тухайд их төвөгтэй.

Александр Шепс үрчлээ гэдэг хүний хувь заяа хэрхэн болж бүтсэнийг шууд өгүүлдэг. Үрчлээ бол өнгөрсөн үеийнх нь гавьяаны тамга тэмдэг, хүний хүсэл тэмүүллийн үзүүлэлт, ахуй амьдралын чанарын гэрч гэж тодорхойлж болно. Хижээл, эсвэл өндөр настай ч хөгшрөлтийн ямар нэг шинжгүй, нүүрэндээ үрчлээ зураасгүй байгаа нь идэвхгүй, залхуу, сэтгэл амарлангуйг өгүүлнэ.

Александр Шепс амьдралдаа болон “Зөн билгийн тулаанд” оролцох явцад хүний нүүрэн дэх үрчлээгээр тухайн хүний тухай мэдээлэл уншиж чаддаг нь тухайн хүний аливаа асуудлын уг сурвалжийн мөн чанар, нууцыг илчлэхэд их тус болж байсан гэж бичсэн байлаа.

АМЬДРАЛДАА ЭД БАЯЛАГ ДУУДАХ АРГА 

Александр Шепс мөнгө дуудан өөрийнхөө амьдралд эд баялаг хэрхэн оруулж ирэх арга хэлж өгсөн юм. Нэлээд хүмүүс мөнгө дуудахад элдэв сахиус зүүлт хэрэглэдэг. Харин Шепс ямар нэг зүйлийг сахиус болгон хэрэглэхээсээ өмнө өөрөө өөртөө болон мөнгөнд хандах хандлагаа заавал өөрчлөх хэрэгтэй. Учир нь мөнгөнд дургүй, мөнгөтэй зөв зүйтэй хандаж харьцаж чаддаггүй хүн үрүү мөнгө хэзээ ч татагддаггүй гэж хэлжээ.

Нэгдүгээрт: Юуны өмнө санаж авах зүйл бол тэнгэрээс мөнгө, эд баялаг өөрөө буугаад ирэхийг бүү хүлээгээрэй. Зүгээр нэг гар хумхиад суугаад байхад мөнгө сая саяараа толой дээр унаад ирэхгүй нь мэдээж. Хүний энерги зөвхөн хүсэл мөрөөдөлдөө чиглээд зогсохгүй, мөнгөтэй болох чинээлэг сайхан амьдрах тухай бодол тээж хичээж зүтгэх хэрэгтэй. Зорилготой, хатуу чанд итгэлтэй, үйл мөр нь зөв байхад үйлс заавал бүтдэг жамтай. Үг хэл, үзэл бодол, үйлдэлтэйгээ зөрж байх учиргүй.

Хоёрдугаарт: хахир харамч зангаасаа салахыг хичээгээрэй. Харамч нарийн хүмүүс сөрөг муу энергийн нөлөөн дор байх эрсдэлтэйгээ хамт аливаа өчүүхэн бага зүйл дээр ч арвилж гамнаж байдаг. Хямдхан юм сул энерги агуулдаг тул үргэлжийн мөнхөд чанар муутай хямдхан юмсын дунд байсаар сэтгэл санаа уруу дорой, мөнгөгүйдэл, өвчин салахгүй зовооно. Түүнээс гадна аливааг хэмнэх нарийлах гэсэн муу зуршил нь харамч зандаа дийлдэн, орлогоо нэмэгдүүлэх тухай санаж сэтгэхийн оронд яаж жаахан хэмнэх вэ? гэсээр … ухаанаа барна.

Гуравдугаарт: Хүнийг баян чинээлэг болоход хамгийн ихээр саад болдог нэг зүйл бол атаархал. Ойр дотныхон болон танил нэгнийхээ элбэг хангалуун байдалд атаархаж явдаг нэгэн үхмэл цэгт гацаж өөдөө дээшээ биш, зөвхөн улам уруудаж дорддог. Атаа жөтөө гэдэг хүнийг хэзээ ч амжилттай бас баян чинээлэг болгодоггүй муу зуршил. Бусдын аз амжилтын тухай бодсоор хамаг энергээ барж өөрийнхөө ахуй амьдралыг дээшлүүлэхэд хүч тэнхээ нь хүрэхгүй болно. Цагаахан атаархал бол өөр хэрэг. Бахдаж бишрэх цагаахан атаархал амжилтанд хүрэхийг шахаж хүсэл тэмүүлэл бадраах хэдий ч тэр бүр зөв зүгт хүнийг чиглүүлдэггүй. Амжилтанд хүрэхийг хичээж чармайж байгаа хэн ч бусдын гаргасан жимээр биш, өөрийнхөө замаар л урагшлах ёстой.

Дөрөвдүгээрт: Өөрийгөө өрөвдөж хөөрхийлөхийг таслан зогсоох хэрэгтэй. Өрөвдөх мэдрэмж хүнийг эрч хүчгүй болгон зөв замаар явахад нь дандаа саад болдог. Хувь заяандаа гомдож суухын оронд юунд яагаад алдсаныхаа учир шалтгааныг эрж хайх хэрэгтэй. Гутранги үзэлтэн өөрөө өөрийгөө үгүй хийдэг. Өөртөө сөрөг муу хандлагатай амьдралаа голж хувь заяандаа гомдож суудаг хүн л ядуу хоосон явдаг гэж Александр Шепс хэлжээ.

Тавдугаарт: Өр тавих, зээл авахаас аль болох зайлсхийх хэрэгтэй. Энэ нь бусдын юмыг хэсэг хугацаагаар түр аваад харин өөөрийнхийгөө бүр мөсөн өгч байгаа хэрэг. Өрийн гүн ангал нүх хүний энергийн төвд сөрөг нөлөөлдөг. Ер нь зарлага хэзээ ч орлогоосоо давах ёсгүй гэдгийг санаарай. Хадгаламжаа зөв хувиарлан, үр ашигтай зарцуулах нь үргэлж мөнгөтэй байлгахаас гадна илүү том, арвин ихийг дуудаж байдаг. Энэ бүх дүрмүүдээ хэрэглэж хэрэгжүүлэх явцад мөнгөний сахиусаа ч мөн дээдлэж явахыг тэрээр зөвлөөд мөнгөний сахиус тань таныг өөртөө улам бүр итгэлтэй байхад хүч нэмэхээс гадна аз амжилт дуудан амьдрах эрч хүч өгсөөр байх болно. Энергийн гэрлэн бүрхүүл тань нээгдэн мөнгө эд баялаг, амжилт орж ирэх бүх нөхцлийг бүрдүүлэхэд дээр өгүүлсэн бүхэн танд тус болно.

Эх сурвалж: Далд ертөнц