Төр Төмбөгөр
Охидыг зэрлэгээр хөнөөж, 25 жилийн хорих ял сонссон Б.Идэрзаяа анхан шатны шүүхийн шийдвэрийг эсэргүүцэн, Нийслэлийн давж заалдах шатны шүүхэд хандсан. Тэгвэл түүний гомдлыг Нийслэлийн шүүх хүлээн авч, шүүгчид хуваарилан өнөөдөр хэлэлцэхээр болсон.
Б.Идэрзаяа нь өнгөрсөн онд Баянзүрх дүүргийн IX хорооны нутаг дэвсгэр, Шар хадны эцэс Хар хошуу хэмээх газар 19-20 насны хоёр охины толгойг нь таслан онц хэрцгийгээр амь насыг нь хөнөөсөн аймшигт хэрэг үйлдсэн юм. Тиймээс анхан шатны шүүхээс түүнд 25 жилийн хорих л оноож, ялын 20 жилийг гянданд, таван жилийг чанга дэглэмтэй хорих ангид эдлүүлэхээр шийдвэрлэсэн юм.
Харин шүүхийн шийдвэрийн дараа түүний эгч нэгэн сайтад ярилцлага өгч, дүүгээ гэм буруугүй хэлмэгдсэн хэмээн мэдээлсэн байдаг. Тэгвэл энэ удаагийн шүүх хурлаар сэжигтэн Б.Идэрзаяа хоёр охиныг хөнөөсөн жинхэнэ гэмт хэрэгтний тухай баримт дэлгэх тухай мэдэгдсэн байна. Гэвч Нийслэлийн шүүхийн хуралд шинэ баримт сэлт дэлгэдэггүй, анхан шатны шүүхийн шийдвэрлэсэн хэргийг бүхэлд нь хянаж, хуулийг хэрхэн зөв хэрэглэж, шийдвэр гаргасан эсэхийг хэлэлцдэг журамтай гэнэ. Тэгэхээр Б.Идэрзаяагийн хувьд шинэ баримт дэлгэх боломжгүй юм.
Тэрээр Б.Идэрзаяагийн өмгөөлөгч хэлэхдээ “Хэд хэдэн баримт бий. Хамгийн чухал нь энэ хэргийг үйлдсэн хүмүүсийг мэднэ гэх хүмүүс бидэнд хандсан. Улмаар энэ мэдээллээ 50 сая төгрөгөөр зарна гэсэн. Энэ хүн Б.Идэрзаяагийн гэр бүлийнхэнтэй холбогдож, “Би энэ гэмт хэргийг үйлдсэн хүмүүсийг мэднэ” гэх утга бүхий албан ёсны тодорхойлолт гаргаж өгсөн. Би тэр тодорхойлолтыг нь шүүхэд өгсөн байна. Гэвч шүүхээс энэ нотлох баримтыг хэрэгсэхгүй болгож шийдвэрлэсэнийг ерөөсөө ойлгохгүй байна” хэмээсэн юм.
Эх сурвалж: Шуурхай.мн
