Төр Төмбөгөр
“Шинэ үе” продакшны хувьд өнгөрсөн жил үнэндээ барцадын жил байв. Одоо л ажил үйлс нь тэгширч, хар цагаан хэл амны номоо уншуулж, хүн бүр өөрийнхөө засал заваагаа сайн хийлгэж, мундаг ламд хамтлагаа даатгасан сурагтай байна. Тус хамтлагийн гишүүд золгүй байдлаар залуу жүжигчнээ хүний нутагт алдаж том гарз амссан бол энэ явдлаас өмнө мөн орон нутагт тоглолтоор явж байгаад хувийн харилцаанаас үүдэж маргалдсан бүсгүйчүүд болох Д.Оюунтуул, Ц.Алдармаа нар нэгнээ буцалсан усаар шалзалж, Туулын биеийн 70 хувийг түлсэн аймшигт хэрэгт унацгаав.
Хэргийн эзэн, хэнгэргийн дохиур болсон Ц.Алдармаа хуулийн байгууллагад шалгагдаж, шүүхийн хаалга татан долоон жилийн хорих ял сонссон. Харин азаар хэргийг дахин мөрдөн байцаалтад буцааснаар жүжигчин бүсгүй хэргээс мултарч, тэнсэн харгалзах ялтай үлдсэн билээ. Тэгвэл эрүүл мэндээрээ хохирсон Туул арьс нөхүүлэх эмчилгээ хийлгэхээр БНСУ-ыг зориод одоог болтол ирээгүй байгаа юм. Тэрбээр урьдчилсан байдлаар эмчилгээгээ хийлгэж, арьсаа солиулах хагалгаанд амжилттай орсон аж. Өдгөө үргэлжлүүлэн эмчилгээгээ хийлгэж байгаа ч ойрын хугацаанд эх орондоо ирэх сурагтай байна.
Харин жүжигчин Д.Оюунтуул продакшндаа эргэж орохгүй бөгөөд ажлаа бүрмөсөн орхихоор шийдэж, цаашид чөлөөт уран бүтээлч болж байгаа гэнэ шүү. Мөн продакшны ахлагч Н.Ариунболд буюу Бооёо энэ талаар ямар нэгэн мэдээлэл хийхгүй гэсэн бөгөөд хувь хүний сонголтыг хүндэтгэнэ хэмээсэн байна. Эх сурвалж www.wikimon.mn
